Musik der Romantik

As Muusig vo dr Romantik (Romantik vo altfranzöösisch romance ‚Dichdig‘, ‚Roman‘) bezäichnet mä d Stilrichdig, wo in dr Muusig vom 19. Joorhundert vorgherscht het. Mäistens däilt mä sä in drei Abschnitt: Früeromantik, Hoochromantik und Spootromantik. Die wichdigste Äigeschafte vo dr romantische Muusig si d Bedoonig uf eme gfüülvolle Usdruck, d Uflöösig vo de klassische Forme, d Erwiterig und schliesslig s Ufgee vo dr dradizionelle Harmonik und d Verbindig vo dr Muusig mit Ideä us andere Kunstgattige, vilmol us dr Litratuur (Brogrammmuusig).

S Orchester isch im Lauf vom 19. Joorhundert immer mee erwiteret worde, für uf dr äinte Site immer usgfallnigere koloristische Fiinhäite chönne Usdruck gee, und uf dr andere Site immer sterkere Iidruck chönne möglig mache. Usserdäm si immer hüfiger Elimänt vo dr Volksmuusig ufgnoo worde, zum Däil im Zug vom Realismus, zum Däil under em Iifluss vo de nazionale Schuele in de chliinere Länder.